Ivanka Trump kutoa ushahidi katika kesi ya babake inayohusu ulaghai dhidi ya raia

Ivanka Trump atalazimika kutoa ushahidi katika kesi ya ulaghai wa raia inayomkabili babake, kaka zake na biashara ya familia, hakimu wa New York alitoa uamuzi huo mnamo Ijumaa, Oktoba 27.

Baada ya Ivanka kuondolewa katika kesi hiyo, mawakili wake walidai kwamba hafai kutoa ushahidi, wakisema kwamba alihama New York, na sasa anaishi Florida na aliacha kazi yake kwenye Shirika la Trump Organization mwaka wa 2017.

Mawakili hao pia walidai kwamba alienda kufanya kazi kwa Donald Trump White House na hakurejea tena kwenye biashara ya familia.

Mawakili wa Ivanka walikuwa wamewasilisha ombi la kufuta hati ya wito kwa ajili ya ushahidi wake katika kesi ya Mwanasheria Mkuu wa New York Letitia James dhidi ya rais wa zamani, watoto wake wa Kiume Don Jr na Eric, Shirika la Trump Organization, na baadhi ya watendaji.

Lakini Jaji Arthur Engoron aliunga mkono serikali, akionyesha hati zinazoonyesha kuwa Ivanka Trump ana uhusiano wa umiliki au usimamizi na baadhi ya biashara huko New York na bado anamiliki vyumba vya Manhattan.

Ivanka alikuwa mtendaji mkuu wa shirika la Trump Organization ambalo limeshutumiwa kwa ulaghai,kuongeza thamani za mali kwenye taarifa za fedha zinazotolewa kwa wakopeshaji, bima na wengine.

Alitupiliwa mbali kama mshtakiwa wa kesi hiyo mwezi Juni baada ya mahakama ya rufaa kupata kwamba madai dhidi yake yalikuwa nje ya sheria ya mipaka.

Wakili wa Ivanka Trump alimwambia jaji Ijumaa kwamba mawakili wa serikali hawana msingi wa kisheria wa kumfanya atoe ushahidi wake.

Jaji Engoron pia alikataa ombi la Ivanka kutoa maelezo yake huko Florida badala ya kutoa ushahidi huko New York.

Wakili wa Donald Trump Chris Kise aliita wito huo kuwa ‘uliendelea kuwanyanyasa watoto wa Rais Trump.’

Rais huyo wa zamani alitoa ushahidi mfupi siku ya Jumatano kujibu maswali ya Engoron kuhusu maoni ya nje ya mahakama.

Engoron alishikilia uamuzi wake wa kumtoza faini ya dola 10,000 Donald Trump kwa kukiuka agizo la mahakama.